ထာꩻခြွီ ထာꩻခူꩻခရာႏ

ကမ္ဘာႏလောင်းကီယိုတဖဲ့ꩻတခေါဝ်ကဲဥ်းအာအာနောဝ်ꩻ လုဲင်းလွုပ်ꩻခြံမာꩻသားအတာႏအခြွီအခူꩻအရာႏယို အရေꩻတန်ꩻမွေးစွဥ်ႏသွူ။နေင်ႏတရေင်အတွက်တာႏ, ဝွေꩻသီးအောဝ်ႏအဒီႏ၊အကောဝ်ႏ၊အရာႏဖုံႏယို ဖေႏကထွာအခူꩻအယံသွတ်ꩻနောဝ်ꩻ လုဲင်းလွုပ်ꩻခြံမာꩻသားအောဝ်ႏစုရွမ်ခါꩻအောဝ်ႏထိန်ꩻသိမ်ꩻဟဝ်သေꩻခါꩻအောဝ်ႏသွူ။

ကမ္ဘာႏယဖဲ့ꩻဖဲ့ꩻသားနောဝ်ꩻ, အခြွီအခူꩻဖြားဖုံႏယို ဝွေꩻသီးပြောင်ꩻသော့ꩻလုဲင်ႏကိုႏစာꩻ၊လုဲင်ႏတင်ႏသော့ꩻတေား အခြွီအခူꩻတသာ(ခေတ်ထွင်ႏစုပါအခူꩻ)သွူ။ကပြွူႏဖြိုထင်ႏထိုလဲဥ်းဒါႏ အမေႏရိကန်ႏတွမ်ႏဥရောပခမ်းကို ကအောဝ်ႏဒါႏကုမ္မဏီႏနောဝ်ꩻ အောဝ်ႏစာအာအာဖေႏခမ်းလင်၊နုဲင်ႏငံႏလင်ဖုံႏသွူ။ဝွေꩻသီးကထေထန်ႏဒါႏ အခြွီအခူꩻယိုယိန်းအာအာလွဥ်တဲင် အဗာႏအာႏဆေ့ꩻအောဝ်ႏလွဥ်သွူ။တမုဲင်ꩻနဲးတဲင် ထာꩻဆာရောႏဂါႏတွမ်ႏခမ်းခေါင်ႏထွာတဲင် အသက်အောဝ်ႏအသက်အန္တရာယ်ႏအောဝ်ႏသွူ။

အခြွီအခူꩻတသာဖုံႏယိုနောဝ်ꩻ ပျဿနာႏအလောင်ႏလင်တဲ့အောဝ်ႏဒျာႏသွူ။ဝွေꩻသီးအခြွီအခူꩻနောဝ်ꩻ ဆို့ꩻလꩻဒေါ့ꩻလꩻလွုမ်ꩻတလဲင်ႏပေႏသွူ။အခြွီအခူꩻကဲဥ်းအာအာဖုံႏနောဝ်ꩻ ဆို့ꩻရုဲင်လꩻတလဲင်ႏစားလွုမ်ꩻသွူ။ကအီႏဆို့ꩻယင်းတလဲင်ႏ အမွူးတသာနောဝ်ꩻ အခြွီအခူꩻအလီꩻယိုသွုံꩻချာတလꩻတောဝ်းသွူ။အခြွီဖြဲးငါငါတဲ့ ဗွိုန်ပီယင်းတွမ်ႏကဆို့ꩻနေင်ႏဟာနောဝ်ꩻ မာꩻတလꩻတောဝ်းသွူ။ကွပ်နောဝ်ꩻမ လုဲင်းလုပ်ꩻခြံမာꩻသားနောဝ်ꩻ စွုမ်ႏနေင်ႏနေင်ႏဆို့ꩻရုဲင်ယင်းထာꩻတာႏ အခြွီအခူꩻယိုဖြေꩻတသာဗာႏယင်းဒျာႏ ကုမ္မဏီႏတန်ထျꩻသွူ။

လုဲင်းလုပ်ꩻခြံမာꩻသားမဥ်ႏသွုံꩻအာအာမွေး ခေတ်တသာအခြွီအခူꩻနောဝ်ꩻ အခြွီအခူꩻလီꩻသဘာႏဝစဲစ်စဲစ်ယိုအထိုꩻမားနွောင်ꩻဒါႏသွူ။ဆုဲင်ꩻဆုဲင်ꩻနောဝ်ꩻ မဲ့အထိုꩻမားတငါဒါႏသွူ။

ကမဲဥ်ဖေႏသေနောဝ်ꩻ နီလုဲင်းလုပ်ꩻခြံယာႏကို ကထန်ႏဒါႏအခြွီအခူꩻသဘာႏဝစဲစ်စဲစ်ယို ခေတ်ပြောင်ꩻလုဲင်ႏစွဥ်ႏအခီႏခီႏလဲ့ ဖေႏကထိုꩻမားမွိုန်းဖေႏကအောဝ်ႏစွူစွူနောဝ်ꩻ လိုႏထိန်ꩻသိမ်ꩻအွဥ်ႏဟဝ်လွငါႏဝင်ꩻဖုံႏယို တာႏဝွန်ႏအောဝ်ႏစွုမ်ႏဖြာꩻသွူ။