လိုꩻသီးထွားခင်လုဲင်း

ယေန်ႏကေႏမုယဟန်ႏနောဝ်ꩻ အုံသော့ꩻအဝ်ႏသော့ꩻဒျာႏ ရွုတ်ပဲင်ꩻဆဲင်ႏရာꩻအသောင်အရင်ꩻနေနေသွူ။ကအောဝ်ႏအုံႏဒါႏပွုံႏစံႏနောဝ်ꩻတဲ့ အပွုံႏစံႏနုဲင်းဒျာႏနီလိုꩻသီးအုံအဝ်ႏမုဖုံႏသွူ။ဝွေꩻသီးနောဝ်ꩻတဲ့ တပြောင်ꩻလုဲင်ႏထိုꩻတောဝ်း ဝွေꩻသီးသဘာႏဝအသောင်အရင်ꩻဒျာႏကိဉ်းအာအာသွူ။နီလိုꩻသီးယေန်ႏကေႏမုပွုံႏစံႏအအာသွတ်ꩻနောဝ်ꩻ ဝွေꩻသီးပေါင်ꩻသော့ꩻငီꩻတွမ်းလိုꩻသီးကမာꩻဒါႏမဲ့ငါလက္ခဏာႏပွုံႏစံႏလိုꩻသီးထွားခင်လုဲင်းနဝ်ꩻသွူ။နောဝ်ꩻမꩻ အရဲးအပါႏဖုံႏ၊အုံကွူႏတာႏအဟေ့ဖုံႏ၊ခင်ႏကာထဲ့ရာꩻဖုံႏ၊ဆို့ꩻသော့ꩻအံႏသော့ကွင်ꩻဖုံႏတွမ်ႏသွို့ခြံဖုံႏသွူ။ဝွေꩻသီးကထွိုင်ႏမာꩻယိုစားတဲင်တွော့ꩻ ဝွေꩻသီးဖျင်မွဉ်းယင်းဝွေꩻသီးရွုတ်ဖဲ့ꩻဆဲင်ႏရာꩻအသောင်အရင်ꩻဖုံႏသွူ။ ဝွေꩻသီးဖျင်ပျင်လွေꩻယင်း သဘာႏဝအသောင်အရင်ꩻဖုံႏအာတန်သွူ။တယ်ႏဆို့ဝေင်ꩻ၊ဒုံ၊လမ်းဖုံႏ၊စင်ရွုံႏဖုံႏ၊တဖူꩻတထာဖုံႏတဲင် ယားကုဲင်တဒွေါ့ꩻထဲ့ထိုꩻဗာႏသေင်ႏဝါႏဖုံႏသွူ။လိုꩻသီးအငွုတ်တဲ့အဝ်ႏနီမျိုꩻနောဝ်ꩻ ရွုတ်ပဲင်ꩻအခဝ်အကွို့ꩻတွမ်ႏလိုꩻသီးအခဝ်အကွို့ꩻနောဝ်ꩻသွူ။