Picard/Poésie picarte/Introducchon

Début de la boite de navigation du chapitre

Picard/Poésie picarte/Yves-Michel Crinon Chole poésie ch’est un ginre litérère fort anchien avuc eds formes variées, écrites généralmint in vers, moais qui admet itou chole prose, et qui privilégie l'espressivité del forme.

fin de la boite de navigation du chapitre

Ès définicion s'révèle diffichile, et pi varie slon chés épokes, au point qu’chake sièke peut li truvoér unne fonccion et pi unne espression diffrinte itou d'un poète à l'eute. Ech mot « poésie » i vint dech grec ποιεῖν (poiein) qui sinnifie « foaire, créer » : ech poète ch’est don un créateus, un inventeus d’formes espressives, chou qu’révèlette itou chés termes du Moïen Âche, conme « trouvoère » et « troubadour ».

Ech poète, éritier d'unne longue tradicion orale, privilégie chole musicalitè et pi ch’ritme, d'où, dins chole majoritè des teskes poétikes, chl' ercours à unne forme versifièe qui confère chele dinsité à chele langue.

Chés mineurs poètes

Charles Bruchet

• Charles Bruchet ch'est un Mineur poète. Il est né in 1925 à Nœux-les-Mines ( Pas-d'Calés ) pi l'est défuncté in 1988.

Écrivures

Il a écrit des poémes in franchoés pi in picard (patoés d'ech Nord). Ech picard, dins ses poémes, s'vouloait accessibe à tous.

• Ma vie de mineur (1977)
• D'hier et d'aujourdhui, écrit avu sin fiu Jean Denis (1984)

Estrait d'ech poéme Les Gaïllettes

In vot sur les enseignes ed'chés marchands d’carbon,

« Ichi, têt'ed'moniaux, ichi, noix et nojettes »,

des noms bien délicats, des biaux mots, ch’est mignon,

mais pou l'mineur ed'fond, tout chà, ch’est des gaillettes.

Mets un'gaillette dins ch'fu, y fait frod dins l’mason,

L’air al’passe par ed’sous l’porte, et j’ai comme des frissons,

Surtout qué j’sors de ch’caudron, et y’a la gripp’ qui cueurt,

J’sus d’jà pas trop costaud, évitons d’aut’ malheurs.

[...]

• L'auteue-compositeue, Christiane Oriol, al a mis in musike sin poéme « À l’ombre des terrils » qu'a té canté pèr Edmond Tanière.

Jules Mousseron

Jules Mousseron i'étot mineur et pi poéte ed Denin. I étot né l'1er ed janvier 1868 pi mort in novimbe 1943.

Ch'est li qu'a rindu célébe Cafougnette qu'étot eune tradichon populoère dech Nord.

Paul Barras

Paul Barras (1886-1969) l' étôt un mineur pis un porion au siège 5 éd Lévin. Il a écrit des poémes.

• Chés écrivures à Paul Barras

● Récits et souvenirs (1927) ● Poésies patoises (1929) ● Sonnets du pays noir (1944)

• Éstrait du poéme Inn' bonn' leçon ===

Inn' bonn' leçon

El' grand dudul étot malade.

Faut vous dir' que ch'est in guinceux

I avot s' nez rouch' comm' in' tomate

A forch' ed' léquer ch' grand buveux.

[...]

Achille zaletzki

Achille zaletzki l'est né l'26 ed juillet 1881 à Nöyel (in frinsé Noyelles-Godault) dins ch'Pas-Calés. Ch'étôt un mineur qu'a vécu à l' chité liméro 5 ed Loos-in-Gohelle|Loo .

Il est défuncté au 18 d'marche 1904 à Loo.

Ch'est un mineur-poéte qu'a écrit "Appollon dins ch'carbon" paru in 1904 .

Éstrait dech poéme Sainte Catherine

Nous avott's toudis soin d' fourrer

Dins l' chabot unn' paire ed' carottes,

Des p'lur's ed' naviots et d' pétotes,

Pour l' baudet d' Saint' Catherine minger...

Édouard David (Tchot Doère)

Édouard David (1863-1932) dit “ Tchot Doère ” ou « Thiot Douaird » , ch’est un poéte picard, nè à Anmien l'9 d'avri 1863.

Ninoche (Éstrait)

Din s’léginde in vers (1910), Édouard David i pérle d’ chés ténébreux din ech onzième cant:

D’pus jeudi, chés cloqu’s sont à Ronme

Por y querre d’s us plein leus grons,

Et chés cloquers, dormant leu sonme,

Sont muets conm’ des poturons.

Aussi, vu qu’i gno point d’école,

Drès l’ matan, chés goss’s, déjouqués,

Conm’ des pigeons qu’o met à l’ vole,

Sont déjo da l’ ru’ tous carqués,

Les eins ployant sous leus cartelles

Ou portant maillets et mart’lets,

Les eut’s agitant leus tort’relles

Ou foisant torner leus batt’lets.

[ … ]

• Édouard David , Ninoche, (1910) , nouvèle Publicachon : 1987 , (94 paches), Éditeu : Societe de linguistique picarde et pi Musée éd Picardie, (1987) p 58 - 65

Raymond Beaucourt

‘’’Raymond Beaucourt’’’ (1867-1925), il o né in 1867 à Vrainne-in-Vérmindoé (in frinsé: Vraignes-en-Vermandois) (Sonme). Ch’est un poète picard.

Éstrait d'ech poéme « Ch'magni »

Èch magni étampi in face d'es melle qu'alle tourne,

Erbéye l'belle poussière fène fournie par ches groins d'or,

Qu'alle s'infonce dins ches sas comme un ernard dins s'fourne,

Mais quidfos l'plointe d'èch vint l'fat rêver ou ll'indort.

[...]

écrivures

• Raymond Beaucourt, In chuivant ches voyettes, Agince d'el région pour el langue picarde, 243 paches, (2019) , ISBN 978-2-954451-69-5
• Quéques poémes is ont té pérsintés pèr René Debrie pi Pierre Garnier din l’érvue Éklitra :
  • Poèmes du Vermandois  ; conminté pèr René DEBRIE et pi Pierre GARNIER. , Éklitra éditeu; vol. XXVI. , 251 p., 15,5 x 24 cm , Imprimerie Sinet (Grandviyé), (1975)

Pierre Garnier

Pik bou
poéme éspacial
Ozieux

Garnier Pierre ch'est un poète picard né l'9 d'janvié 1928 à Anmien pi défuncté au 1 ed févrié 2014.

• Ozieux, poèmes spatialistes in dialecte picard, Éklitra, Anmien, 1967
• Ozieux 2, Nords - Textes, Nords / Bergike, Ottignies, 1976
• Chés Cabotans (aveuc eune traduction in picard éd Tornai d'Marcel Hanart), Nords / Bergike, Ottignies, 1978
• El Tére a bètes, poèmes in picard, supplémint del érvue le Jardin ouvrier , Anmien, 1996
• El Tére el tète, poèmes in picard, supplémint del érvue le Jardin ouvrier, Anmien, 1998
• Ech Catieu d’Pinkigni (aveuc auchi chés versions d’Olivier Engelaere pi d’Ivar Ch'Vavar), poèmes in picard, Secondes Éditions du K., (reprises par Engelaere éditions), Aro, 2003 , ISBN 2913934056
• Ech Biœ tenp, poème in picard, supplémint del érvue L’enfance n°1, Anmien, 2005

Charles Lamy

Charles Lamy l'est nè au 3 d'octobe 1848 à Kimbré. Ch'est un poéte picard. Il est défunctè l' 14 d'octobe 1914.

• Passe-timps kimberlots (5 volumes : 1891, 1892, 1893, 1894, 1900)
• Visions , Poèmes en patois kimberlot, in Mémoires de la société d'émulation de Cambrai (1897) vir dzeur Gallica
• Contes d’pépère (1905)

Marceline Desbordes-Valmore

Marceline Desbordes-Valmore (1786 – 1859) ch' est eune poéte nèe à Doué l’20 éd join 1786. Ale est morte à Paris l’23 éd juillet 1859.

Éstrait dech poéme : Oraison pour la créche - A toutes les belles nos dames de Douay.

(Publié in 1849 din l’Indépendant) :

Douq! Douq! ch'est pour chés p'tiots infans,

Rassennés din l'vill' ed Gayant,

Comm' des tintes maguett's din chés camps.

Si j'étos eunn' saquoi tranquille,

J'viendros canter l'cloqué d'no' ville ;

Mais ch'est fameus'mint difficile !

[ … ]